ចំពោះប្អូនៗដែលគ្មានលទ្ធភាពបន្តការសិក្សារហូតចប់ថ្នាក់វិទ្យាល័យ សូមកុំអាក់អន់ចិត្ត ឬគិតថាវាជាឧបសគ្គរារាំងប្អូនៗឱ្យសោះ។ បើអាច ប្អូនត្រូវស្វះស្វែងរករៀនចំណេះជំនាញវិជ្ជាជីវៈណាមួយ ក្នុងចំណោមមជ្ឈមណ្ឌលបណ្តុះបណ្តាលជាច្រើន តាមវិស័យដែលប្អូនត្រូវការ ហើយ​ដែលវាក៏ឋិតនៅក្នុងការចាប់អារម្មណ៍ និងចំណង់ចំណូលចិត្តរបស់ប្អូន។ តាមការសង្កេតរបស់ខ្ញុំ បច្ចុប្បន្ននេះទីផ្សារការងារនៅប្រទេសកម្ពុជាយើងកំពុងតែត្រូវការ និងខ្វះខាតបំផុតនោះគឺកម្លាំងពលករ និងកម្មករជំនាញ។ ឧទាហរណ៍ ផ្នែកវិស្វកម្ម អ្នកបច្ចេកទេសអគ្គិសនី និងជាងជួសជុលអេឡិចត្រូនិកជាដើម។ ចំណេះជំនាញវិជ្ជាជីវៈទាំងនោះ អាចរកប្រាក់ចំណូលបានស្មើ ឬច្រើនជាងអ្នកដែលទទួលបានការសិក្សាដល់ថ្នាក់បរិញ្ញាបត្រ ឬអនុបណ្ឌិតទៅទៀត។ ដូច្នេះសូមប្អូនៗទាំងឡាយកុំអស់សង្ឃឹម កុំបាក់ទឹកចិត្ត ឬមើលរំលងសក្តានុពលរបស់ខ្លួនឯងឱ្យសោះ។