ស្រ្តីនិងបុរស គឺជា​តំណាង​ស្មើ​ភាព​គ្នា​ទៅ​វិញ​ទៅ​មក។ ពួក​យើង​ទាំងអស់គ្នា​​មាន​តួនាទី​ស្មើៗ​គ្នា​នៅ​ស្ទើរ​តែ​គ្រប់​ទិដ្ឋ​ភាព​ទាំង​អស់​នៃ​ជីវិត គ្រាន់តែ​ថា​ស្ត្រី​មាន​​តួនាទី​ផ្តល់​កំណើត​ដល់​យើង​គ្រប់ៗ​គ្នា។
ទោះបីជា​ស្រ្តី​មាន​តួនាទី​សំខាន់​យ៉ាង​នេះ​ក្តី យើង​នៅ​តែ​មើល​ឃើញ​ពី​​វិសមភាព​រវាង​បុរស​និង​ស្រ្តី​ដដែល ពោល​គឺ​ស្ត្រី​តែង​តែ​ទទួល​បាន​តួនាទី ការគោរព និង​បៀវត្ស​ទាប​ជាង​អ្វី​ដែល​បុរស​ទទួល​បាន។
បុរស​មាន​កំណើត​ពីស្ត្រី ហើយ​ជីវិត​នឹង​កាន់​តែ​មាន​ន័យ​បើ​បុរស​និង​ស្ត្រី​ចេះ​រួម​រស់នៅ​ជាមួយ​គ្នា​ដោយ​ល្អ។ បើ​ខ្វះ​នរណា​ម្នាក់ នោះ​ជីវិត​នឹង​គ្មាន​ភាព​ពេញ​លេញ ខ្វះ​ភាព​កក់​កៅ្ត និង​អាច​ប្រឈម​បញ្ហា​ជីវភាព​មិន​ខាន។ ប៉ុន្តែ​បើ​នៅ​ជុំគ្នា នោះ​ជីវិត​នឹង​ពេញ​លក្ខណៈ និង​ប្រកប​ដោយ​សេចក្តី​សុខ សុភមង្គល។
បើបុរស​ជា​ស្តេច ច្បាស់​ណាស់​ស្រ្តី​គឺ​ជា​មាតា ជា​អ្នក​ចិញ្ចឹម​បី​បាច់​ថែរក្សា និង​ជា​អ្នក​ទំនុក​បម្រុង​ស្តេច​មិន​អាច​ប្រកែក​បាន​ឡើយ។ ចូរ​ពួក​យើង​គោរព​លើក​តម្កើង និង​ឱ្យ​តម្លៃ​ម្ចាស់​ក្សត្រិយ៍​របស់​យើង​គ្រប់​ពេល​វេលា ដរាប​ណា​ព្រះអាទិត្យ​នៅ​តែរះ។
ការ​លើក​តម្កើង​តម្លៃ​ស្រ្តី មិន​ចាំ​បាច់​ត្រូវតែ​រង់ចាំ​ឱ្យ​ដល់​ទិវា​សិទ្ធិ​នារី​អន្តរ​ជាតិទេ។

Neak Oknha Mengly J. Quach, MD, MPH